प्रधानमन्त्रीद्वारा जेन-जी प्रदर्शनमा भएको क्षतिप्रति दुःख व्यक्त

काठमाडौं, भदौ २३। प्रधानमन्त्री केपी शर्मा ओलीले जेन–जी पुस्ताले आह्वान गरेको प्रदर्शनका क्रममा भएको दुःखद घटनाले आफू अत्यन्तै मर्माहत भएको प्रतिक्रिया दिनुभएको छ ।

उहाँले घटनामा निर्दोष नागरिकले ज्यान गुमाउनु परेकोप्रति गहिरो दुःख व्यक्त गर्दै मृतकका परिवारजनलाई उचित राहत र घाइतेहरूको निःशुल्क उपचारको व्यवस्था गर्ने प्रतिबद्धता जनाउनु भएको छ ।

प्रधानमन्त्री ओलीले जेन–जी पुस्ताले राखेका मागप्रति सरकार नकारात्मक नभएको स्पष्ट पार्दै प्रदर्शनमा विभिन्न स्वार्थी तत्त्वहरूको घुसपैठका कारण अप्रिय अवस्था सिर्जना भएको दाबी गर्नुभएको छ । उहाँले जारी गर्नु भएको वक्तव्यमा ‘हाम्रा छोराछोरी पुस्ताले आफ्ना माग शान्तिपूर्ण रूपमा राख्नेमा हामी आश्वस्त थियौँ, तर घुसपैठका कारण संवैधानिक निकायका कार्यालयहरूमा तोडफोड र आगजनी भएका घटनाले ज्यान जाने स्थिति सिर्जना भयो ।’

उहाँका अनुसार प्रदर्शनका आयोजक स्वयंले समेत घुसपैठ भएको थाहा पाएर सबैलाई घर फर्कन आह्वान गरिसकेपछि बाह्य तत्त्वहरूले तोडफोड र आगजनी गरेका हुन् । प्रधानमन्त्री ओलीले सामाजिक सञ्जालबारे पनि स्पष्टीकरण दिनुभएको छ । उहाँले सरकारले सामाजिक सञ्जाल बन्द गर्ने नीति नलिएको बताउँदै अदालतको आदेशअनुसार नेपालमा दर्ता र सूचीकरण गर्ने प्रक्रिया पूरा नगरेका कारण अस्थायी रूपमा केही प्लेटफर्म निष्क्रिय गर्न बाध्य भएको जानकारी दिनुभएको छ । उहाँले भन्नुभएको छ– ‘राज्यको कानुन र अदालतको आदेशअनुसार सामाजिक सञ्जाललाई व्यवस्थित गर्ने हाम्रो प्रयास हो, नयाँ पुस्ता प्रभावित भएकामा हामी संवेदनशील छौँ ।’

प्रधानमन्त्री ओलीले घटनाको छानबिन गरी आगामी दिनमा यस्ता दुर्घटना दोहोरिन नदिने बताउनु भएकाे छ । त्यसका लागि १५ दिनभित्र प्रतिवेदन बुझाउने गरी छानबिन समिति गठन गरिने आश्वासन दिनुभएको छ ।

आज भएको प्रदर्शन रोक्ने क्रममा प्रहरी कारबाहीमा परी २० जनाको ज्यान गएको छ भने ठुलो सङ्ख्यामा युवाहरू घाइते भएका छन् ।

यस्ताे छ प्रधानमन्त्रीकाे वक्तव्य