मुक्ति समाज नेपाल बाँकेले बुझायो ज्ञापनपत्र
सिन्धुली घटनाको निष्पक्ष छानबिन गर्न माग
बाँके । मुक्ति समाज नेपाल जिल्ला कार्य समिति बाँकेले सिन्धुली घटनाको निष्पक्ष छानबिनका लागि जिल्ला प्रशासन कार्यालय बाँके मार्फत ज्ञापनपत्र बुझाएको छ ।
सिन्धुलीको इलाका प्रहरी कार्यालय खुर्कोटको हिरासतमा रहेका २३ वर्षीय श्रीकृष्ण विकको मृत्यु भएको घटनाको निष्पक्ष छानबिनका लागि मुक्ति समाज नेपालले देशभरको जिल्ला प्रशासन कार्यालय मार्फत दबाब स्वरूप ज्ञापनपत्र बुझाएको हो।
प्रहरी महानिरीक्षक दान बहादुर कार्कीले राष्ट्रिय प्रहरी प्रशिक्षण प्रतिष्ठानका प्रहरी नायब महानिरीक्षक (डीआईजी) दिनेश कुमार आचार्यको संयोजकत्वमा पाँच सदस्य छानबिन समिति गठन गरि सकेका छन् ।
जबरजस्ती करणी मुद्दामा अनुसन्धानका लागि सिन्धुली जिल्ला अदालतबाट म्याद थप भई न्यायिक हिरासतमा रहेका विक गत वैशाख ७ गते हिरासतको शौचालयमा झुण्डिएको अवस्थामा फेला परेका थिए ।
उपचारका क्रममा उनको मृत्यु भएपछि घटना शङ्कास्पद रहेको भन्दै विरोध प्रदर्शन भइरहेको थियो। छानबिन समितिमा प्रहरी उपरीक्षक रबिन्द्र नाथ पौडेल, प्रहरी निरीक्षकहरू इन्द्रजित सुनार र प्रेम रेग्मी तथा प्रहरी नायब निरीक्षक राजेश्वर सापकोटा सदस्य रहेका छन्।
गठन भएको समितिलाई घटनाको तथ्यगत एवम् वस्तुनिष्ठ छानबिन गरी ७ दिनभित्र प्रतिवेदन पेस गर्न कार्यादेश दिइएको छ। छानबिन समिति गठन भएसँगै पीडित पक्षले गरिरहेको आन्दोलन तत्कालका लागि स्थगित गरिएको थियो ।
